El Mercáu Artesanu y Ecolóxicu de Xixón torna a la Plaza Mayor los díes sábadu 14 y domingu 15 de febreru, con artesanía, gastronomía artesano y ecolóxico y actividaes especiales venceyaes a San Valentín y al Antroxu. Un fin de selmana p’atopase colos oficios, los tastos del territoriu y propuestes participatives pa tolos públicos.
Hai creaciones que nun tán pensaes para durar y precisamente ehí radica’l so valor. Esisten mientres un intre, concentren tola so fuerza nesi momentu y depués desapaecen. Lloñe de ser una perda, esa caducidá conviérteles en daqué único. El cartelu de febreru del Mercáu Artesanu y Ecolóxicu de Xixón naz dende esa idea, la guapura como esperiencia, non como oxetu permanente.Nun ye la primer vegada que febreru s’espresa asina. L’añu pasáu, otra composición vexetal marcaba’l tonu d’esti mes estableciendo una mirada qu’agora torna, non pa repetise, sinón pa continuar un diálogu. Dos febreros distintos, una mesma intención, crear dalgo perguapo y efímero, como una manera de pescanciar la creación y el tiempu.
Esa filosofía coneuta de manera direuta col mesmu Mercáu Artesanu y Ecolóxicu. El MAE ye tamién un acontecimientu efímeru, asocede mientres unes hores concretes, nun llugar concretu y el so valor ta no que se comparte nesi tiempu. Los alcuentros colos artesanos y pequeños productores, les charres posaes, el descubrimientu de los oficios y de los tastos faen de cada edición una esperiencia irrepetible. Nada se repite talmente igual, cada mercáu ye únicu poles persones y los momentos compartíos.
El sábadu 14 y el domingu 15 de febreru, el MAE vuelve a la Plaza Mayor de Xixón nel so horariu avezáu, de 11 a 15 h y de 17 a 21 h, y el domingu hasta les 20 h. La plaza va tresformase mientres tol fin de selmana nun espaciu d’alcuentru y convivencia, onde pasiar, parase y parolar forma parte esencial de la esperiencia.
Nel mercáu vas poder atopar artesanía direutamente de quien lo creen, acebache, cueru, talla de madera, telar, xoyería, vidru, pintura o cerámica. Oficios que comparten esa mesma lóxica del tiempu y de l’atención al detalle y que convierten cada pieza en dalgo más qu’un oxetu.
Lagastronomía artesano y ecolóxico completa’l percorríu con propuestes que tamién s’esfruten nel momentu, quesos, miel, mermelaes, embutíos, pan, vinu y productos de güertu ecolóxico, ente otros. Sabores amestaos al territoriu y a una forma de producir que pon en valor l’orixe, la calidá y el respetu polos ritmos naturales.
Nesta edición de febreru va haber actividaes de baldre especiales qu’amplíen la esperiencia del mercáu. El sábadu 14 de febreru, col títulu de“Abri’l to corazón a l’artesanía” va desarrollase untaller especial de San Valentín, nel que se va facer una bolsa-funda pa móvil fecha a partir deretayos de vaqueros que yá nun s’useny a los que se-yos va dar una segunda vida con remiendos y repasaos cenciellos.
El domingu 15 de febreru, el mercáu ábrese al antroxu, con actividaes especiales como un taller infantil de creación de mázcares pensáu pa que la reciella participe del mercáu al traviés del xuegu y la creatividá.
Vanespublizase noticies cola información en detalle de l’actividá.
Febreru recuérdanos otra vuelta qu’hai guapura no que namás asocede una vez. No que se comparte, nos alcuentros y nos momentos vivíos. Como’l MAE, un mercáu que nun se guarda, sinon que s’esperimenta.
