La tercer edición de “Pallabra de Muyer” vuelve al Mercáu Artesanu y Ecolóxicu de Xixón pa visibilizar y destacar el llabor de les muyeres qu’escribieron a lo llargo de la historia, poniendo especial atención nes autores n’asturianu. Los díes 12 y 13 d’ochobre, les actividaes del mercáu invítente a celebrar el Día de les Escritores con un programa mui interesante.

La Fundación Municipal de Cultura, Educación y Universidá Popular de Xixón, al traviés de la Oficina de Normalización Llingüística y l’Asociación Mercado Ecológico y Artesano, entamen a comuña’l programa “Pallabra de Muyer”, col que se sumen a la celebración del Día de les Escritores los dos primeros díes, xueves 12 y vienres 13 d’ochobre, del Mercáu Artesanu y Ecolóxicu de Xixón, que se va celebrar na Plaza Mayor.

Mercáu Artesanu y Ecolóxicu de Xixón

Ye una muestra d’artesanía yá afitada como un referente artesanal, gastronómicu y turísticu del Principáu d’Asturies. La calidá de los productos ye’l distintivu y el reclamu principal, xunto coles actividaes y talleres qu’organicen dende que nació, fai ventiún años.

La edición d’ochobre trai a la Plaza Mayor de Xixón la meyor artesanía y gastronomía los díes xueves 12, vienres 13, sábadu 14 y domingu 15 n’horariu de 11:00 a 15:00 y de 17:00 a 21:00 h (domingu hasta les 20:00 h).

Día de les Escritores

El 16 d’ochobre celébrase’l VIII Día de les Escritores, orgnaizáu pola Biblioteca Nacional d’España, qu’esti añu escoyó’l tema “El placer, l’allegría y la risa de les muyeres”.

Esti añu queremos facer del Día de les Escritores una xornada de celebración doble. Celebración d’una escritura y d’una manera de percibir la realidá silenciada munchu tiempu, y celebración d’esa espresión del gociu, l’allegría y la risa que davezu tamién ye un tabú pa muyeres educaes na resignación, la discreción y el sacrificiu.

El 16 d’ochobre vamos rir y falar del placer.

El placer énte’l disfrute de la naturaleza, los viaxes, la comida, los conocimientos; el placer del erotismu ensin culpabilidá, de la llectura y la escritura; la sonrisa afilada de la sátira y el sentíu del humor como tabla de salvación nos tiempos más aciagos… Porque la risa y l’allegría siguen viéndose con rocea en sociedaes que tovía esixen a les muyeres cierta discreción y modestia. Sometimientu y silenciu. El 16 d’ochobre vamos facer ruíu n’harmonía.

Les voces, en castellanu, catalán, gallegu y eusquera, van lleganos d’una oriella y otra del océanu Atlánticu, y quiciabes la música tamién evoque’l llau más lluminosu de la fiesta…

Marta Sanz, comisaria de la VIII edición del Día de les Esritores 2023

Pallabra de Muyer

Por tercer añu consecutivu, “Pallabra de Muyer” ofrez un programa d’actividaes col que s’invita al públicu a sumase a la celebración del Día de les Escritores.

Los díes 12 y 13 d’ochobre, mientres la edición del Mercáu Artesanu y Ecolóxicu de Xixón, la iniciativa abre un espaciu pa dar voz a les muyeres que, col so llabor lliterariu, dexaron escritu’l so legáu, poniendo especial atención nes lletres de muyer n’asturianu.

Programa d’actividaes:

Toles actividaes son de baldre y nun requieren inscripción previa.