Pallabra de Muyer vuelve al MAE del 11 al 13 d’ochobre pa celebrar el Día de les Escritores. A lo llargo de tres xornaes, la Plaza Mayor de Xixón va ser escenariu de llectures, teatru y propuestes n’asturianu que vindiquen la voz de les muyeres na lliteratura y el so llugar na memoria coleutiva.
El Mercáu Artesanu y Ecolóxicu de Xixón conviértese otra vuelta nun espaciu onde la cultura y la tradición s’alcuentren, llenando de vida la Plaza Mayor los díes 11, 12 y 13 d’ochobre, n’horariu de 11:00 a 15:00 y de 17:00 a 21:00 (el llunes hasta les 20:00 h).
Más allá de l’artesanía y la gastronomía, el mercáu ábrese tamién a propuestes que busquen ampliar miraes y dar voz a quien a lo llargo de la historia quedaron nos márxenes del rellatu oficial. Una d’elles ye la celebración del Día de les Escritores, impulsada dende 2016 pola Biblioteca Nacional d’España, que cada mes d’ochobre vindica la voz de les autores, bien de veces arrequexaes nun segundu planu.
Esti añu, la conmemoración oficial va ser el 13 d’ochobre cola conseña de “1975: ¡Escribíi, compañeres!”, que recuerda’l 50 aniversariu d’un momentu clave de transición política y social, honrando a les escritores que llucharon pola igualdá y la llibertá al traviés de la so obra.
El MAE súmase otra vuelta a esta cita con una programación especial que va enllenar de lliteratura y memoria los tres díes de mercáu.
Pallabra de Muyer
Dende 2021, el MAE súmase al Día de les Escritores con un programa propiu: Pallabra de Muyer. Entendíu como un espaciu pa visibilizar el papel de les muyeres na lliteratura, esti ciclu desarróllase venceyáu al asturianu, poniendo en valor la llingua como vehículu de memoria, cultura y creación.
A lo llargo de les sos ediciones, Pallabra de Muyer acercó la obra de distintes autores al traviés de cuentacuentos, talleres, representaciones teatrales y recitales poéticos, siempres con un formatu que convida a la participación. La figura de Xosefa de Xovellanos, primer escritora en llingua asturiana y fondamente venceyada a la ciudá, foi un referente constante y protagonista d’actividaes.
El programa cuenta cola collaboración de la Oficina de Normalización Llingüística de Xixón, que sofita l’usu del asturianu como llingua vehicular. Asina, Pallabra de Muyer consolidóse como una cita imprescindible dientro de la programación cultural del mercáu.
Nesta nueva edición, Pallabra de Muyer vuelve con una programación mui especial pensada pa emocionar, vindicar y, sobre manera, averar al públicu a la riqueza de la lliteratura fecha por muyeres. Una propuesta que combina sensibilidá y compromisu con actividaes diseñaes pa toles edaes, de baldre y ensin necesidá d’inscripción, y col asturianu como filu conductor.
Esti añu escoyimos como lema: “El silenciu ábrese con tinta. ¡Escribíi, compañeres!”, una revisión propia del eslogan del Día de les Escritores de 2025, “1975: ¡Escribiíi, compañeres!”. El nuestru lema da-y puxu a la idea de que la escritura ye la llave qu’abre puertes, ruempe silencios y da voz a quien a lo llargo de los sieglos quedó nos márxenes de la historia.
La imaxe del nuestru cartelu represéntalo con claridá: una pluma d’ave, símbolu de la escritura, cola punta que se tresforma nuna llave recordándonos que cada pallabra escrita tien el poder d’abrir caminos hacia la memoria, la llibertá y la igualdá.
Sábadu 11 · Domingo 12 · Libros que nos acompañen
Horariu: Sábadu 11 d’ochobre, de 12:00 a 15:00 h, y domingu 12 d’ochobre, de 17:00 a 20:00 h.
El MAE abre un espaciu especial pa les llibreríes de la nuestra ciudá, que se sumen a la celebración del Día de les Escritores cola voz imprescindible que tienen. Dos llibreríes de Xixón van compartir cola xente una escoyeta de títulos pensada con procuru, averando propuestes diverses y actuales que conviden a descubrir nueves autores y rellatos.
Amás de la presentación y venta de llibros, va haber actividaes sorpresa. Entre les ayalgues que se van poder alcontrar, l’asturianu va tener un llugar destacáu como llingua de creación, reflexando la riqueza de la nuestra identidá
Sábadu 12 · Tocar les pallabres
Horariu: de 17:00 a 20:00 h
La carpa del MAE va acoyer un alcuentru mui especial nel que la pallabra femenina va tar presente de delles maneres . Una artesana testil, Sheila Gervasoni, una actriz y directora teatral, Anacelia Álvarez, y una violinista y cantante, Mónica Acevedo, van xuntar les sos voces y talentos pa dar vida a poemes escritos por muyeres de tolos tiempos y llugares. Testos que marmuren, glayen, canten y curen; pallabres que nos atraviesen y nos recuerden lo que toes llevamos dientro.
Como pieslle, una poeta asturiana va compartir col públicu los sos versos, íntimos y poderosos, con raigaños na tierra qu’habitamos y nes histories que nos xunen. Una invitación a escuchar, sentir y celebrar xuntes la fuercia tresformadora de la pallabra.
Llunes 13 · Actividaes Infantiles
Horariu: de 12:00 a 15:00, de 17:00 a 18:00 y de 18:30 a 19:30 h
La reciella va tener un espaciu propiu pa deprender y divertise con propuestes pensaes especialmente pa ellos. Una de les actividaes más creatives va ser “Visti a Xosefa”, onde van poder diseñar un traxe pa la escritora Xosefa de Xovellanos utilizando recortes de los sos poemes imprentaos en papeles de colores.
Con esta dinámica, amás d’estimular la imaxinación y el xuegu, avérase la figura de la primera autora n’asturianu a les nueves xeneraciones d’una manera orixinal, visual y participativa.
Llunes 13 · Xosefa de Xovellanos visita’l mercáu
Horariu: 13:00 h
La escritora Xosefa de Xovellanos, pionera de la lliteratura femenina n’asturianu nel sieglu XVIII, va cobrar vida na voz y nel xestu de la actriz ya historiadora Arantza Margolles.
Nún formatu que combina historia y teatru, Xosefa va percorrer el mercáu pa falar cola xente, contar la so vida y acercar la so obra, venciendo la so mirada ilustra col llema d’esti añu.
Va ser una oportunidá única pa redescubrila nun ambiente cercanu y familiar, recordando amás que’l so nome yá aportara a les casi de xixón colaa denominación de la Argandona y que güei vuelve tar presente na memoria coleutiva gracies a laconsulta ciudadana que busca facer xusticia a la so verdadera identidá: Xosefa Xovellanos.
Llunes 13 · Cuentacuentos con Sergio Buelga
Horariu: 18:00 h
Sergio Buelga, maestru de la narración oral, va presentar un espectáculu de 30 minutos dirixíu principalmente a les neñes y neños. El cuentacuentos va tar basáu nel lema d’esti añu. Buelga, amás de contar histories, va interactuar col públicu infantil, convidándolos a participar na creación de nuevos rellatos qu’evoquen la temática, siempres dende una perspeutiva de xéneru.
Síguinos nes redes sociales
Si formes o quies formar parte de los amigos del mercáu, si te presta la nuestra manera de plantegar les coses, si quies conocenos más o tar al día de lo que facemos, convidámoste a siguinos nes redes sociales.
