El Mercáu Artesanu y Ecolóxicu celebra en xunu una edición especial inspirada en Gaudí, con tres cites n’Avilés (6 y 7), Xixón (13 y 14) y Uviéu (20 y 21). Artesanía, gastronomía, actividaes y propuestas especiales xúnense nun percorríu creativu que rinde homenaxe al universu modernista del gran artista catalán.
Nel cartel d’esta edición, una sacavera de cerámica construyida como un mosaicu de trencadís dibuxa la lletra G convirtiéndose en símbolu y homenaxe. El so pelleyu fragmentáu en teseles de color, la so forma orgánica y esi aire fantásticu que paez qu’escapó d’un xardín imposible remiten nel intre al universu d’Antoni Gaudí, al xuegu ente naturaleza, artesanía y arquiteutura que convirtió la so obra en dalgo inconfundible.
Esa ye precisamente la inspiración que traviesa les tres ediciones de xunu del Mercáu Artesanu y Ecolóxicu (MAE): una celebración de la creatividá fecha a mano, de la guapura que naz de la materia y de la imaxinación que tresforma lo cotidiano en dalgo estraordinario.
Mientres esti mes, el MAE va percorrer tres ciudaes asturianes con una programación especial dedicada al espíritu gaudinianu: Avilés los díes 6 y 7 de xunu en Las Meanas, Xixón el 13 y 14 de xunu na Plaza Mayor y Uviéu el 20 y 21 de xunu na Plaza Porlier, siempre en’horariu de 11:00 a 15:00 y de 17:00 a 21:00 hores, y pon el ramu’l domingu a les 20:00 hores.
Como na obra de Gaudí, onde la artesanía ocupaba un llugar esencial y cada detalle se trabayaba con procuru, el mercáu va axuntar una escoyeta cuidada d’artesanes/os y pequeñes/os productores que trabayen direutamente les sos creaciones y productos propios, ofreciendo una esperiencia cercana, auténtica y llena de matices.
Ente los puestos van poder atopase pieces de cerámica, xoyería, ilustración, madera, testil, cueru, cosmética natural, vidriu, complementos y otros oficios artesanales, nun percorríu onde cada oxetu lleva detrás el xestu de la persona que lu crea y una manera propia d’entender l’oficiu. L’artesanía apaez equí non solo como productu, sinón como llinguaxe, como espresión creativa.
Al llau d’ella, el mercáu va volver a ofrecer el so espaciu dedicáu a la gastronomía artesana y ecolóxica, con productores qu’ellaboren directamente quesos, dulces, conserves, panadería, embutíos, miel y otres propuestes agroalimentaries de calidá, averando sabores con identidá y orixe.
Pero xunu va tener amás un ingrediente especial. Inspirándose nel universu colorista, orgánicu y sorprendente de Gaudí, esta edición va incorporar actividaes temátiques y propuestes especiales que van enanchar la esperiencia del mercáu y van permitir al públicu descubrir formes nueves d’averase a la artesanía, la creatividá y el xuegu.
Porque, como pasa colos mosaicos del modernismu, el MAE vuelve a atropar pieces distintes que, xuntes, construyen dalgo mayor, un espaciu onde tradición, imaxinación, gastronomía, cultura y alcuentru s’entellacen pa llenar de vida’l corazón d’Avilés, Xixón y Uviéu mientres tres fines de selmana siguíos.
Actividaes especiales: edición Gaudí
Taller d’estampación inspiráu en Gaudí
Un taller creativu guiáu por Lorena Poncela pa esplorar l’universu visual de Gaudí al traviés del color, les formes orgániques y el llinguaxe del trencadís. Cada participante va diseñar y estampar la so bolsa usando sellos inspiraos nos sos mosaicos y patrones más carauterísticos. Actividá gratuita, con materiales incluyíos y inscripción previa na web.
La sacavera de Gaudí, un taller pa la reciella
Una propuesta pensada pa que la reciella descubra l’imaxinariu de Gaudí al traviés d’ún de los sos símbolos más reconocibles: la sacavera. Guiaos por Isabel Soberado, van poder crear la so versión pintando y reinterpretando esta figura inspirada nel mosaicu gaudinianu. Actividá gratuita, ensin inscripción previa y con materiales incluyíos.
Trencadís en vivo, esposición y photocall temáticu
La téunica del trencadís va tar presente con una demostración en vivo de creación de mosaicu, una esposicionina divulgativa y un photocall temáticu inspiráu nesta estética tan carauterística de Gaudí. Una propuesta visual y participativa p’averase de forma cenciella a ún de los llinguaxes más reconocibles de la so obra. Actividá gratuita pa tolos públicos.
Nos díes vininentes va publicase una noticia con tola información ampliada sobre horarios, desarrollu de les actividaes y inscripciones.
MAE Avilés | 6 y 7 de xunu | Las Meanas
Horariu: 11:00 a 15:00 h y 17:00 a 21:00 h, domingu hasta les 20:00 h
Actividaes edición Gaudí
Sábadu: Taller d’estampación inspiráu en Gaudí (12:00 y 17:00 h, inscripción previa)
Domingu: Taller infantil La sacavera de Gaudí
Otres Actividaes
Sábadu y Domingu: En Ruta con Celi pela Senda sin Gluten nel Mercáu
Proyeutu Coopera visítennos les ONGs:
Sábadu: PROCLADE
Domingu: Médicos Mundi
Carpa de voluntariáu: Eugenia Téllez (alimentación pa persones celíaques) + BIODEVAS (voluntariáu xuvenil socioambiental)
MAE Xixón | 13 y 14 de xunu | Plaza Mayor
Horariu: 11:00 a 15:00 h y 17:00 a 21:00 h, domingu hasta les 20:00 h
Actividaes edición Gaudí
Sábadu: Taller d’estampación inspiráu en Gaudí (12:00 y 17:00 h, inscripción previa)
Domingu: Demostración de trencadís + Taller infantil La sacavera de Gaudí
Otres Actividaes
Sábadu: Día Mundial del Donante de Sangre
Proyeutu Coopera visítennos les ONGs:
Sábadu: ACCEM
Domingu: Amnistía Internacional
MAE Uviéu | 20 y 21 de xunu | Plaza Porlier
Horariu: 11:00 a 15:00 h y 17:00 a 21:00 h, domingu hasta les 20:00 h
Actividaes edición Gaudí
Sábadu: Taller d’estampación inspiráu en Gaudí (12:00 y 17:00 h, inscripción previa)
Domingu: Demostración de trencadís + Taller infantil La sacavera de Gaudí
En Ruta con Celi pela Senda ensin Gluten nel Mercáu
Una propuesta pa identificar productos seguros pa persones con celiaquía y sensibilizar sobre la importancia d’evitar el gluten y la contaminación cruzao. Una ruta informativa y accesible pa descubrir el mercáu con ferramientes nueves y señalética específica.
Día Mundial del Donante de Sangre
El mercáu súmase a esta xornada solidaria con una acción especial de sensibilización y invitación a la donación, reforzando’l so compromisu cola salú y la participación ciudadana.
Proyeutu Coopera
Un espaciu solidariu integráu nel MAE onde distintes ONGs y asociaciones comparten el so llabor col públicu, dando a conocer proyeutos sociales, humanitarios y d’economía solidaria. Una oportunidá p’averase a iniciatives nueves, conversar coles y colos sos voluntarios y descubrir formes de collaborar y participar.
El MAE convida asina a vivir tres fines de selmana nos que l’artesanía, la gastronomía y la creatividá s’alcuentren baxo la inspiración de Gaudí, convirtiendo Avilés, Xixón y Uviéu n’escenarios pa descubrir, participar y dexase sorprender. Una edición especial pensada pa pasiar pel mercáu con otra mirada, ente color, formes y propuestes pa disfrutar en familia.
