El Mercáu Artesanu y Ecolóxicu torna a la Plaza Mayor de Xixón los díes 10, 11 y 12 d’ochobre con una programación qu’inclúi artesanía, gastronomía, cultura y participación. Son tres xornaes p’alcontranos alredor del movimientu, la pallabra y los oficios, y pa descubrir cómo distintes formes de crear pueden abrir caminos nuevos hacia’l futuru.
Un llibru puede contener munches coses: puede guardar una historia, una alcordanza, un poema o una voz que daquién escribió va munchu tiempu y que tovía alcuentra la manera de llegar hasta nós. Puede falanos del pasáu, pero tamién abrir una puerta a lo que ta por venir.
Nel cartelu d’esta edición, les páxines d’un llibru conviértense nun llugar d’alcuentru. Enriba d’elles apaez un osu grande que tien enfrente un mur piquiñin que sostién una flor colorada. Esta semeya apara l’instante d’una historia qu’inda nun conocemos, como si acabáremos d’abrir el llibru xusto nesa páxina y nos convidaren a imaxinar qué asocede depués.
Sobre la ilustración apaez una frase que resume buena parte de lo que va pasar nos díes de mercáu:
«MAE XIXÓN: SEMANDO VERSOS, TEXENDO FUTURU.»
Semar versos y texer futuru: poner daqué nel mundu pa que llueu puea crecer n’otres manes, n’otres voces, n’otres miraes.
Un versu puede semase pa que daquién lu atope, un oficiu puede enseñase pa qu’otra persona lu tresforme, una historia puede pasar d’una xeneración a la siguiente y topase cada vez con una manera nueva de ser contada… Y ye ehí onde entama’l percorríu d’esta edición, ún que nos lleva de les pallabres a los oficios, de la lliteratura al movimientu y de la creación artística a aquello que deprendemos d’otres persones pa siguir tresformándolo.
Pero enantes d’entamar el percorríu, reparamos no que fai posible que’l MAE esista cada mes: les persones que tán detrás de cada puestu, de cada pieza y de cada productu.
La Plaza Mayor vaenllenase otra vuelta d’artesanía y gastronomía n’horariu de 11:00 a 15:00 y de 17:00 a 21:00 hores, anque l’últimu día pieslla a les 20:00 hores.
Cerámica, xoyería, madera, testil, cueru, ilustración y otros tantos oficios… Cada pieza cuenta una manera de trabayar, unos materiales, unes decisiones y una historia que nun se ve de mano. Averanos a quien les crea déxanos descubrir tolo qu’hai detrás d’aquello que, por fin, aporta a les nuestres manes.
Amás, el mercáu axunta productos alimenticios ellaboraos y producíos n’Asturies: quesos, miel, embutíos, dulces, productos de la güerta y otres propuestes que nos averen a una forma de consumir más consciente.
Esi ye’l puntu de partida de cada MAE, alcontranos con quien crea, produz y caltién vivos los sos oficios, descubrir pieces, tastiar sabores y llevar pa en casa a casa daqué que representa muncho más.
Y al rodiu d’esto, esta edición propón mirar, participar y deprender.
Movese ye alcontrase
El sábadu 10 d’ochobre, el MAE va abrir les puertes a una propuesta que va convertir el mercáu nun espaciu pa la danza.
Ente les 11:30 y les 13:30 hores, va dase una de les actuaciones del XXVI Festival d’Artes del Movimientu Danza Xixón 2026.
Nesta ocasión, el mercáu va acoyer una jam session de dances del Océanu Índicu y dances urbanes afro, protagonizada por Salim Mzé Hamadi y Oulouy.
Dos universos de la danza urbana africana y d’anguaño van alcontrase nel MAE pa convertilu nun llugar de celebración, conexón y espresión coleutiva. Los ritmos del afrohouse, ndombolo, coupé-décalé, amapiano o azonto van dialogar con otres formes d’esplorar el cuerpu, el suelu, la tierra, l’horizonte y el cielu.
Arriendes d’esto, como detalle d’interés, el públicu tamién va poder formar parte de la danza.
La sesión ta abierta a la participación espontánea, anque s’encamienta apuntase primero . En casu de lluvia, l’actividá va treslladase al CCAI y, por limitaciones d’aforu, namás van poder participar les persones que s’apuntaren.
Semar pallabres
El domingu 11 va celebrase’l Día de les Escritores y les pallabres van garrar protagonismu con una nueva edición de Pallabra de Muyer, una iniciativa que’l MAE desendolca cola Oficina de Normalización Llingüística de Xixón dende 2021 pa visibilizar el papel de les muyeres na lliteratura y poner en valor l’asturianu como llingua de memoria, cultura y creación.
A lo llargo d’estos años, Pallabra de Muyer vien averando la lliteratura a la ciudadanía al traviés de cuentacuentos, talleres, representaciones teatrales y recitales poéticos, y siempre busca demostrar que la pallabra amás de sentila, ye dalgo no que podemos participar.
La programación d’esti añu va tener como figura central a Xosefa de Xovellanos, cabezalera de la lliteratura femenina en llingua asturiana nel sieglu XVIII y mui venceyada a Xixón.
A les 12:30 hores, la escritora va cobrar vida al traviés de la voz y el xestu de l’actriz y historiadora Arantza Margolles nuna propuesta qu’entemez historia y teatru. Xosefa va percorrer el mercáu, a falar col públicu al tiempu que-y averala so vida yla so obra.
A les 13:00 hores, va llegar el turnu de la poesía con un recital de Mercedes Ruisánchez, escritora en llingua asturiana, que va compartir el so trabayu y mirada poética.
Y la pallabra va siguir medrando pela tarde.
A les 18:00 hores, Sergio Buelga va ufiertar un cuentacuentos d’unos 30 minutos dirixíu sobre manera al públicu infantil.
Amás, el domingu lla reciella va tener un espaciu propiu pa conocer a Xosefa de Xovellanos nun taller infantil que va desarrollase de 12:00 a 14:00 y de 17:00 a 20:00 hores. Ente les propuestes va tar «Visti a Xosefa», una actividá na que van diseñar un traxe pa la escritora utilizando recortes de los sos poemes impresos en papeles de colores.
Crear futuru coles manes
Y el llunes 12, l’artesanía va volver a allugase nel centru de la escena.
L’artesana Vanessa de la Campa, de V. de la Campa Studio, va ufiertar una demostración en direuto de tornería de madera, de 12:00 a 15:00 y de 17:00 a 19:30 hores.
Mientres les sesiones, va amosar de forma práutica los pegoyos del oficiu y cómo remanar les ferramientes de corte necesaries pa dar forma a una pieza. Va ser el momentu de reparar en cómo un material se tresforma nes manes de quien conoz l’oficiu, ún que s’aprende, se prautica y se tresforma con cada xeneración.
Semeyes: Archivu Arcu Atlánticu
Nestes tres xornaes, el MAE va volver a axuntar artesanía, gastronomía y actividaes na Plaza Mayor de Xixón, lo qu’amplía l’espaciu hacia otres formes de creación.
La danza va ocupar l’espaciu públicu y la lliteratura va salir de les páxines p’alcontrase con quien s’acerque al mercáu. Xosefa de Xovellanos va caminar otra vuelta ente nós y los neños y neñes van poder xugar coles sos pallabres. La madera va recordanos que detrás de cada pieza esiste un conocimientu, unes ferramientes y unes manes que les deprendieron a usar.
Too ello al rodiu d’una idea cenciella: semar lo que queremos que siga medrando.
El Mercáu Artesanu y Ecolóxicu de Xixón va tar na Plaza Mayor del sábadu 10 al llunes 12 d’ochobre, de 11:00 a 15:00 y de 17:00 a 21:00 hores (el llunes pieslla a les 20:00 hores).
La PROGRAMACIÓN especial va allargase los tres díes del eventu:
SÁBADU 10 D’OCHOBRE
Danza Xixón 2026 · 11:30–13:00 h
Salim Mzé Hamadi + Oulouy · Sesión de dances del océanu Índicu y dances urbanes afro.
DOMINGU 11 D’OCHOBRE · PALLABRA DE MUYER
Xosefa Xovellanos · 12:30 h
Con Arantza Margolles.
Recital de poesía · 13:00 h
Mercedes Ruisánchez Gutiérrez.
Taller «Visti a Xosefa» · 12:00–14:00 y 17:00–20:00 h
Actividá creativa y participativa p’averase a la figura de Xosefa Xovellanos.
Cuentacuentos · 18:00 h
Con Sergio Buelga.
LLUNES 12 D’OCHOBRE
Amuesa de tornería de madera · 12:00–15:00 y 17:00–19:30 h
Vanessa de la Campa.
