El Mercáu Artesanu celebra’l día d’Asturies
El 8 de setiembre Asturies ye una fiesta, celebramos el nuestru día. Y el Mercáu Artesanu y Ecolóxicu de Xixón súmase a la festividá con un eventu que va tar na Plaza Mayor de la nuestra villa los díes sábadu 7, domingu 8 y llunes 9 de setiembre.
Vivir nel Principáu ye esfrutar tol añu del paraísu. Ye daqué que sabemos toles persones que nos sentimos xuníes a esta tierra y que bien lluego perciben les persones que nos visiten.
Asturies ye un sitiu con muncha historia y tradición. Un heriedu históricu que se reflexa na so arquiteutura y nos sos vezos. Asturies ye’l so paisaxe. Espectacular dende los sos montes, viesques tupíes, ríos, brañes y playes salvaxes. Asturies ye tamién cultura, vagar y gastronomía. Elementos mui venceyaos a la nuestra manera d’entender la vida.
Nel Mercáu Artesanu y Ecolóxicu de Xixón vamos celebrar con vós el día d’Asturies. Como cada mes, dando puxu a l’artesanía y a la gastronomía de la nuestra tierra al traviés d’una escoyeta de preseos y productos artesanos.
Un ambiente guapu con música y actividaes (ver programa). Xuegos n’asturianu, taller participativu de cestería y la visita especial del Conceyu de Llaviana que nos trai la tonada de Pablo Carrera y a los “Gaiteros del Carbón”.
Trés díes “Xugando coles pareyes”, un chisgu pa cola normalización del usu delasturianu con un xuegu col que vamos echar un ratadín, restolando y empareyando diferentes dibuxos que tienen el nome n’asturianu y en castellanu. Y el llunes ‘l taller de «pescando palabres».
Vamos viaxar ensin movenos de la Plaza Mayor de Xixón a Llaviana. Vamos esfrutar de la bayura del potencial turísticu del conceyu, que pa la so visita al mercáu tien preparaes delles sorpreses pa pasar un día bárbaru con vós.
Un puestu d’información turística centraráse nel turismu cultural y natural, el potencial del conceyu, que puede conocese al traviés de siete intinerarios culturales y que promocionaran llunes 9 al traviés de folletos, plotters y otros materiales.
¡Tais convidaos y convidaes a celebrar con nós!
Llugar: Plaza Mayor de Xixón.
Díes: Sábadu 7, domingu 8 y llunes 9 de setiembre.
